Gebedsbrief September 2018

Liewe Vriende,

"Die Here sal vir julle veg- wees julle maar net stil".

Dié teks uit Exodus 14:14 was Sondag die 2de September die tema rondom die begrafnis van Evangelis / Ouderling / Oom Jakob Baardman.
Dit was ook sy eie gunsteling-vers. Die vol kerk en baie huldeblyke het gewys watter groot voetspoor hy in Gobabis en verder getrap het. Veral sy toegewyde lewensroeping om met die San-mense te werk, sal baie gemis word. Hy was maar enig, almal se oupa, en op daardie manier 'n unieke getuie vir die Here Jesus.

Voorbidding: dat die Here op sy manier die leemte sal vul en dat ons wysheid mag hê om te weet hoe om die San-mense wat na hom opgesien het, te bedien.

Onlangs het Madeleen by die Africa Trek van OM aangesluit. Nadat sy by 'n firma in Windhoek gewerk het, het sy besluit om weer tyd in OM deur te bring. Op die oomblik is hulle êrens in Zambië. Daarna beweeg die groepie na Malawi en Tanzanië. Sy beplan om daarna op haar eie na vriende in Kenia, Uganda en Rwanda te reis.

Voorbidding: leiding en bewaring, Johannes 17.

Binnekort vertrek Jac-Louis, Gijsbertha en klein Adam vir 'n tyd na Nederland. Ons prys die Here vir alles waarin ons kan saamwerk, in Sy Koninkryk. Hierdie tyd van die jaar is dit ook belangrik om bronne te soek waaruit die werksaamhede van Lig vir die Kinders in die komende jaar onderhou kan word; Jac-Louis-hulle werk ook hard hieraan.

Voorbidding: 'n Vredevolle, vrugbare besoek aan vriende en familie; oop deure en geloof.

Donderdag 6 September vlieg ek en Betsie na Kimberley om Betsie se suster Elsie te gaan besoek, wat met kanker gediagnoseer is.

Vrede,
Henk